ဘဝကိုဝိုင်းအောင်ရွီး

Photo-K/T Memories 

ဘဝကိုစိတ်မာမှတ်

လက်ဇာနှစ်ချောင်းထောင်ရဖို့လည်း

သမိုင်းစာမျက်နှာထက်က

ယုံရခက်စရာတိအစား

လက်တွိဘဝကို ဝိုင်းအောင်ရွီးဖို့

နားတိကြားဖို့

မျက်စိတိမြင်ဖို့

ယုံကြည်ချက်တိခိုင်မာဖို့...

ရက်ကျဆန်နိန်ရေဘဝ

တလုပ်တဆုပ်နန့်

ဘဝကိုသိမ်းထုပ်ထားတွင်း

အတိုးကအရင်းဖြစ်

ဘဝကိုကျွန်စိတ်သွင်းပစ်ဖို့အစား

အာရက္ခရို့

ပင်လယ်နန့်လှိုင်းစွာခွဲမရရေပိုင်

မလွတ်မြောက်ခြင်းနန့်နိမ့်ကျခြင်းကိုခွဲမရ

အလင်းစွာတပြောင့်တည်းလားရေ

အကွေ့အကောက်ရောင်ပြန်တိကတော့

မတူကွဲပြားမှုရို့၏ချစ်စဖွယ်ဘာသာစကားရာဖြစ်တေ။

ဒုက္ခဆိုကေလည်း

ငါရို့ကရခိုင်လူမျိုးရာ

နီလာကေနှင်းပျောက်လားပါလိမ့်မေ

မျက်စိကိုစုံမှိတ်

နှလုံးသားကိုယုံတမ်းစကားမဟုတ်တေ

ယုံကြည်ခြင်းတိပီးဖို့

အာရက္ခနိုင်ငံတော်သီးခြင်းကို

သံပြိုင်လိုက်ဆို...ကတ်။

                                ပန်းသီကြိုး(ရသေ့တောင်)

                                28-1-2023/10:41PM

သူကဘုရားမကြိုက်စွာမလုပ်

သူက

ဘုရားမကြိုက်စွာမလုပ်

အလိမ်အဝါကခေတ်ကာလနန့်ရာဆိုင်ရေ

သူက

ဘုရားမကြိုက်စွာမလုပ်

မတော်လောဘက ခေတ်ကာလနန့်ရာဆိုင်ရေ

သူက

ဘုရားမကြိုက်စွာမလုပ်

မာန်မာနတိက ခေတ်ကာလနန့်ရာဆိုင်ရေ

သူက

ဘုရားမကြိုက်စွာမလုပ်

မတရားခြင်းက ခေတ်ကာလနန့်ရာဆိုင်ရေ

သူက

ဘုရားမကြိုက်စွာမလုပ်

‌ဘဝင်ရှုးခြင်းက ခေတ်ကာလနန့်ရာဆိုင်ရေ

သူက

ဘရားမကြိုက်စွာမလုပ်

အဆိုးမြင်ဝါဒက ခေတ်ကာလနန့်ရာဆိုင်ရေ

သူက

ဘုရားမကြိုက်စွာမလုပ်...

သူက

ဘရားမကြိုက်စွာမလုပ်...

သူက

ဘုရားမကြိုက်စွာမလုပ်

သူက

ဘုရားမကြိုက်စွာမလုပ်

သူကလွဲကေ အားလုံးသူသိရေ။

                    ပန်းသီကြိုး(ရသေ့တောင်)

                    ၂၀-၁-၂၀၂၃

အမှား(၉)

အေသတ္တဝါလို့ပြောလိုက်မိလို့

မာန်ပါခရေ

ကျွန်တော် ဇာမှားခပါလည်း။

                  ပန်းသီကြိုး

                  6-1-2023

မြင့်မားခြောက်ကပ်လာရေအသိဉာဏ်တိ

မျက်နှာ နောက်ဆုံးပေါ်အသားအရီအတု

အထားအသိုက ပုံစံတကျမှားဖို့

လမ်းခုလတ်တိုင်းစွာ 

ထိုမရောက် ဒေမရောက်။

မှတ်ဉာဏ်ထဲက ထိုမကျဒေမကျလူးသားတိထွက်ကျ

မြင့်မားခြောက်ကပ်လာရေအသိဉာဏ်

လမ်းတိမာရွင့်နိန်ရေ၊

လှည်ကွက်မဆန်ရေမျက်လှည်ဆရာတိပိုင်

အရိုးစတိ၏စိုထိုင်းစကိုရှာဖို့ အပူတပြင်း

အမြတ်ထုတ်တေဆိုစွာ

အမြတ်တိကိုအထုပ်ထုပ်ထားလိုက်စွာလား

စိုင်းစားကြည့်ရေ

ဟုတ်ယာဖိ

မြင့်မားခြောက်ကပ်လာရေအသိဉာဏ်တိကပြောရေ

ခေါင်းပုံဖြတ်တေဆိုစွာ

ခေါင်းတိပုံနိန်လို့အဖြတ်ခံကတ်ရစွာလား

စိုင်းစားကြည့်ရေ

ဟုတ်ယာဖိ

မြင့်မားခြောက်ကပ်လာရေအသိဉာဏ်တိကပြောရေ

သာရာပင်း တိစွာလောက်ကောင်တိပိုင်ဗျာယ်လို့

မြင့်မားခြောက်ကပ်လာရေအသိဉာဏ်တိကပြောရေ

ဟုတ်ယာဖိလို့ ငါပြန်ပြောလိုက်တေ။

                             ပန်းသီကြိုး

                             5-1-2023/5:43AM

မြင့်မားခြောက်ကပ်လာရေအသိဉာဏ်တိ

ရှင်းလင်းချက်(၂)

ရွာပြန်ဖို့ဆိုစွာကအိမ်မက်တခု

ဒေါင့်ဒဲကျနိန်ရေ ကင်းစွန်းခင်းပိုင်ရာ

မျှော်လင့်ချက်တိဆိုစွာက

ရွက်နုထိုးလိုက် ကိုက်ဖြတ်ခံလိုက်

စစ်ပွဲကို ပတ်စာခွါဖျာသိမ်းဖို့

မိုးသောက်လို့လည်း

တနီဝင်လို့လည်း

ယင်းပိုင်နန့်

ပတ်စာလည်းမကွာ

ဖျာလည်းမသိမ်း

ရွာတိမာ တဂျိမ်းဂျိမ်း။

ကြည့်ဖူးရေရုပ်ရှင်နန့်

ကြုံဖူးရေအဖြစ်ကမတူ

ရုပ်ရှင်ထဲမာဆိုစွာက သရုပ်ဆောင်စွာရာမလား။

လွတ်ရာလွတ်ကြောင်းတိကိုရာ

အားပြု

သမီးချေမမှတ်မိခရေရွာကအိမ်အကြောင်း

သမီးကိုပြောပြရဖို့သိမ့်။

                               ပန်းသီကြိုး(ရသေ့တောင်)

                               11:18PM/2-1-2023

ရှင်းလင်းချက်(၁)

အပူချိန်ကြားကိုစိမ့်ဝင်ကြီးစိုးလာရေအအီးဓာတ်

၂၄နာရီစာဆန်းသစ်မှုကလည်းရက်ပျက်များရေ

အလုပ်သမားတယောက်ပိုင်

လက်ထိုးနှိုက်ထုတ်လိုက်တိုင်း

မဆီမဆိုင်အိမ်မက်တိနန့်

ဒေပိုင်ဉာဉ့်တိစွာ ။

အမှောင်စွာအမှောင်ကိုရှာယင်း

အမှောင်ထဲမာ

...

ငါ့ထဲမာ။

အချိန်ကသံချောင်းခေါက်သံအဖြစ်

နှင်းတိစွာအမှုံအမွားချေအဖြစ်

နောက်ဆုံး 

ဆယ်စုနှစ်တိအဖြစ်။

                       ပန်းသီကြိုး(ရသေ့တောင်)

                       1-1-2023/9:47PM

ဒဇင်ဘာ၏နောက်ဆုံးစက္ကန့်စွာမိုးထခြောက်နာရီ

ညဇာဖက်သားငါးချက်တီးကပင်နှင်းတိကျလို့

ဒဇင်ဘာကဇာအရူးထစွာလည်း

မကောင်းနိုင်ရေလမ်းတိပိုင်

ဒဇင်ဘာကရုန်းရင်းဆန်ခတ်နိုင်ရေ

အသံစုံမြည်ရေ

ယင်းအထဲကမှ

ဂုတ်မဖော်နိုင်ရေပုလင်းတလုံး

မဖုံးရှာမရလိုက်ယာဖြစ်တေပုလင်းတလုံး

လှဲနိန်ရာကပြောရေ

သန်းခေါင်တိုင်ကေငါ့ကိုနိုးပါလတ်။

လပပျပြင်ချေနန့်

မြူခိုးဝဝီချေနန့် 

20°C အောက်ကိုငုတ်ဆင်းလာရေညဉ့်စွာ

စည်းကားတောင်ထက်က တရားဖွင့်သံနန့်

ခွီးတကောင်ထဟောင်သံစွာ တချိန်တည်းလာဖြစ်တေ

တိုက်ဆိုင်ရေဆိုစွာလည်း

တတည့်မကျရေပစ်မှတ်တခုပိုင်

ချိန်လို့ပစ်မှလွဲလားစွာမျိုး

ယပိုင်မျိုးပါ 

ယပိုင်မျိုးပါရာ

အသက်ရှူသံကြမ်းကြမ်းတိက

ချစ်သူပါးကို နှစ်သစ်ဆုတောင်းပီးဖို့

အချိုသာဆုံးပုံစံနန့် လမ်းလျှောက်ထွက်းလားပါယာ

ညဉ့်စွာနက်လာရေ

လစွာပလာရေ

မျက်စိစွာမှိတ်လာရေ

ယပြီးကေ

...

...

နောက်တရက်‌ခြောက်ချက်တီးခါမငါနိုးရေ။

                              ပန်းသီကြိုး(ရသေ့တောင်)

                              31-12-2022/10:37PM

အရိပ်လားအစစ်လား

အမှောင်မာမြင်ရေ အမှောင်ကိုမြင်ရေ

သီ ဆုံး ခြင်း။ 

ဟ ဟ့ ဟား

ကြောက်တေ ကြောက်နိန်ရေ

မင်း

နင်

မင်းရို့

နင်ရို့

ဟ ဟ့ ဟား

သီခြင်းတရားစွာ ခြောက်ကပ်အပ်ကွဲနိန်ရေလို့

အသံပြာအောင်အော်နိန်လား

လမ်းမရ စမ်းမရ

ဟ ဟ့ ဟား

ကိုယ် ချင်း စာ တ ရား 

အမှောင်နန့်လောက

အမှောင်၊လောက

ဆိတ္ဆီတိများလာ

သီရဖို့ကြောက်တေဆိတ္ဆီတိများလာ

အမှောင်လောကကြုံဂြီးသင်းပန်းကျလာ

ဟ ဟ့ ဟား

အမှောင်စွာအရောင်တမျိုးမဟုတ်လား

ပြော ပြော ပြောကတ်ပလား

ကမ္မဝါဖတ်လို့

စည်းတားလို့

ပရိတ်မန်းတရား

ဇာအရံအတားနန့်

ဟန့်ဖို့ 

နောက်ဆုံးပေါ်ဆိတ္ဆီတမျိုး

ဗားရှင်းအမြင့်ဆုံးဗိုင်းရပ်စ်

ဟ ဟ့ ဟား

လူ နန့် ဆိတ္ဆီခွဲဖို့

ခြည်မန်းဆွဲပီးလို့လည်းမရကာ

ကပ်ပါးကောင်တိကိုသောက်မြိုထားမိရေကမ္ဘာ

ဆိတ္ဆီ အာ့....

အမှောင်ရင့်လီ အားကြီးလာလီဗျာယ်။

                          ပန်းသီကြိုး(ရသေ့တောင်)

                          29-12-2022/9:12PM

              

အဆုံးတဖက်ကအစတခု၏အသက်ရှူခြင်း

ချစ်သူ၏အသက်ရှူသံတိက

ပါးပြင်ထက်မာ အီးစက်စက်ဖြတ်သန်းလားရေ

အပါးချေပါရာ

လက်တအုပ်စာ ဂမူချေထက်မာ

အိစက်စက်ပေါ်ကျလားရေ

အဆုံးနန့်အစစွာ ရထားတစီးပိုင်လွန်းထိုးယင်း

နောက်ဆုံးမာ အမြင့်ကိုရောက်ခပါယာ။

ငြိမ်သက်လားရေဗလောင်ဆူသွီးစက်တိလည်း

အအီးဓာတ်နန့်တတူ အနည်ထိုင်လားယာ

လက်တကမ်းစာကမ္ဘာစွာ

အရပ်မျက်နှာမဲ့လျှက်

တိတ်ဆိတ်ခြင်းစွာငြိမ်သက်စီးမျောလျှက်

ယင်းပိုင်နန့် အာရုဏ်တက်ခယာကားယေ

မျက်စိတဆုံးအရပ်မာ‌ပေါ်နိန်ရေ

ပန်းကနူတ်တိကိုကြည့်ယင်း

စီးကရက်ဘူးထဲက

နောက်ဆုံးစီးကရက်တလိပ်ကို

နောက်ဆုံးဖွာရှိုက်ယင်း

နောက်ဆုံးမှုတ်ထုတ်လိုက်တေ မခိုးတိနန့်။

                                 ပန်းသီကြိုး(ရသေ့တောင်)

                                 ၁-၁-၂၀၂၃/8:27AM