ဘုတ်ငှက်မြည်တဲ့တေးသံ

လက်နက်ကြီးသံအဆုံးမှာ
အပင်ပေါ်က ငှက်တစ်အုပ်
လန့်ပျံသွားတယ်

မြို့ငယ်လေးတစ်မြို့ရဲ့
ညနေဆည်းဆာဟာ
ဆူဆူညံညံနဲ့
တိတ်ဆိတ်သွားတဲ့ညတစ်ကို
ဖြတ်သန်းရပါတော့မယ်
ဆိုင်ကယ်လီဗာကိုနင်းကန်ဖြဲမယ့်
လမ်းသရဲလိုလိုကောင်တွေလည်း
စောစောအိပ်တန်းတက်ကြရတော့မယ်
ကလေးငယ်တွေဟာ
ညတွေရဲ့လရောင်ကိုခံစားခွင့်
ပျောက်ဆုံးနေမယ်
လမ်းထဲကခွေးတောင်
စုပြီးမအူရဲတဲ့အကြောင်းရင်းက
ဝမ်းဖိုးဖိုး ထုတ်ထားကြောင်း
ထုတ်ဖော်ပြသနေမယ်
ကောင်မလေးတွေရဲ့အိမ်ရှေ့က
ဂစ်တာသံတွေလည်း
ဆိတ်သုန်းနေမယ်
မှောင်မဲနေတဲ့မြစ်ပြင်ထဲမှာတော့
လက်နက်တပ်ဆင်ထားတဲ့
သင်္ဘောတစ်ဆင်းဟာ
ကျောက်ချရပ်နားထားလေရဲ့
သင်္ဘောပေါ်ကအမြောက်ကြီးက
မြစ်တစ်ဖက်ကမ်းက
မှိန်ပျပျမီးရောက်လက်နေတဲ့
တံငါသည်တစ်ဦးရဲ့အိမ်ကို
မျက်စောင်းထိုးနေတဲ့အကြောင်း
ဒီရေအတက်အကျမှာအော်တတ်တဲ့
ဘုတ်ငှက်တစ်ကောင်က
သီချင်းလုပ်ဆိုနေလေရဲ့။
ပန်းသီကြိုး(ရသေ့တောင်)
. ၁၈.၁၁.၂၀၁၉