လက်တို့လိုက်စမ်းပါ

______________________
အပြစ်မဲ့ကလေးတွေ
အမြောက်ဆံကြောင့်သေခဲ့ပြီ

လက်တို့လိုက်စမ်းပါ
ဒီအကြောင်းမသိသေးတဲ့သူတွေကို
လက်တို့လိုက်စမ်းပါ
ဒီအကြောင်း မသိချင်ယောင်ဆောင်နေတဲ့သူတွေကို
လက်တို့လိုက်စမ်းပါ
ဒီအကြောင်း
မမြင်ချင်ယောင်ဆောင်နေတဲ့သူတွေကို
ကလေးတွေရဲ့ပါးပေါ်ကသနပ်ခါးမှာ
သွေးစီးကြောင်းတွေပေကျန်ခဲ့တဲ့အကြောင်း ပြောပြလိုက်စမ်း
မိဘတွေရဲ့အရှင်လတ်လတ်အခွဲခံလိုက်ရတဲ့
ရင်ဘတ်တွေအကြောင်း
ပြောပြလိုက်စမ်းပါ
သွေးဆာနေတဲ့
လူမဟုတ်တဲ့အကြင်နာမဲ့သူတို့အကြောင်းကို
ပြောပြလိုက်စမ်းပါ
သွေးအိုင်ထဲလဲနေတဲ့ မိခင်တွေအကြောင်း
ခြေထောက်ပြတ်သွားတဲ့ကလေးတွေအကြောင်း
ဘာမှမစားရသေးတဲ့အူတွေကို
ထုတ်ပြလိုက်ရတဲ့ကလေးလေးအကြောင်း လက်တို့လိုက်စမ်းပါ
မေ့ချင်ယောင်ဆောင်နေသူတွေကို
အလုပ်ရှုပ်ချင်ယောင်ဆောင်နေသူတွေကို
လက်တို့လိုက်စမ်းပါ
သာသာယာယာနဲ့နိုးထနေရတဲ့အရပ်မှာ
နားပင်းနေသူတွေ
မျက်စိကန်းနေသူတွေ
ရူးချင်ယောင်ဆောင်နေတဲ့သူတွေ
မျက်နှာပြောင်တဲ့သူတွေကို
ဒီအကြောင်းတွေကိုပြောပြလိုက်စမ်းပါ
နည်းပညာမြင့်မားတဲ့ခေတ်မှာ
ခင်ဗျားတို့မသိချင်တာတွေထက်
ခင်ဗျားတို့သိချင်တာတွေကိုရှာဖွေလိုက်ပါ
ခင်ဗျားတို့မိသားစုတွေပဲမိသားစုလား
ခင်ဗျားတို့အိမ်တွေပဲအိမ်လား
ခင်ဗျားတို့ရပ်ကွက်တွေပဲ ရက်ကွက်လား
ခင်ဗျားတို့မြို့တွေပဲမြို့လား
ခင်ဗျားတို့ဒေသတွေပဲဒေသလား
လက်တို့လိုက်စမ်းပါ
မသိချင်ယောင်ဆောင်နေကြရင်တောင်
လိပ်ပြာမလုံအောင်ဘဝကိုဖြတ်သန်းကြဖို့
လက်တို့လိုက်စမ်းပါ။
ပန်းသီကြိုး(ရသေ့တောင်)
၃.၁၂.၂၀၁၉