မြစ်တိပိုင်စီးရေ သွီး

မြစ်က သွီးကြောတိပိုင်စီးရေ
ဒေအထိ ပြဿနာ မဟိမ့်
သွီးက မြစ်ပိုင်ပြန်စီးရေ
သွီးချောင်းစီးခြင်းလား

ဒေပြဿနာ အတိမ်အနက်ကို
သောက်လက်စ အရက်ခွက်နန့်မျှောချလိုက်ယင့်
ခမဦးကသွီးစွာ ငယ်ထိပ်ကိုရောက်လို့။

ဇာကိုယုံရဖို့လည်း...
အားလုံးက ပလီကိုင်

ဇာကိုယုံရဖို့လည်း...
အားလုံးကအစိုးရ

ဇာကိုယုံရဖို့လည်း...
အမှားများလာရေ နိရက်တိ
တရားရှားလာရေ လောဘတိ
အနိန်အထိုင်မတတ်ကေ
ရပ်စောက်သီကျလားဖို့...

သွီးတိက သွီးပိုင်စီးဆင်းခွင့်မရ
မဟာဂရုဏာတော် ပျောက်ကျလားရေလမ်းမာ
ပင်လယ်ကို သဗြုသီးပိုင်ကြိုသောက်
ငါစွာ ဇာမှန်းမသိ...

အမှောင်ကို အရောင်မြှင့်ကြည့်လိုက်တေ
မြင်ကွင့်တိအဆုံးမာ
ဒဏ်ရာ
ဒဏ်ရာ
သွီးထွက်လွန်နိန်ရေ
စိတ်ဒဏ်ရာတိနန့်

ဘဝဆိုစွာ သွီးနန့်မြစ်ကိုမှားလို့
စီးဆင်းနိန်ယင့်။

                           ပန်းသီကြိုး(ရသေ့တောင်)
                           ၂၈-၉-၂၀၂၁

မယူမြစ်ကမ်းထောင်းတ‌နေရာ

မယူမြစ်ကလှိုင်းတိကိုထိုင်ကြည့်
မဆီမဆိုင်...
မူးယစ်မိရေအတိတ်ထဲမာ
ဂုတ်မဖော်နိုင်အောင်မူးလို့

သွီးသားသန့်စင်ခြင်းအတွက်
လှိုင်းပုတ်သံတိကို ရွီးဆွဲ
ငါကတော့ ကမ်းခြေတစ်ခုထက်မာတင်လို့
အမှိုက်တခုပိုင်

မပြီးဆုံးနိုင်ရေချစ်ခြင်းကို
သံသရာအတွက်
သိက္ခာထပ်နိန်ရေအတ္တနန့်
ငါ့မာ   လှလိုက်ရစွာလည်းအမော

အမှိုက်ဆိုးတိကိုချောင်းမာဝဲ
အဆိုးအညစ်မှန်သမျှနန့်
ဒေမြစ်ကို ဇာဖို့ချစ်ပြနိန်ရစွာလည်း

ရှည်လျားလွန်းရေ မျဉ်းတစ်ကြောင်းပိုင်
ကိုယ်အလုပ်နန့်ကိုယ် သက်ဆိုးရှည်ခစွာတိကို
စီးဆင်းပြလိုက်ပါယင့်
လက်တွိဘဝဆိုစွာထက်
သာလွန်ရေဘဝတစ်ခုထက်မာ
ဒေ အိမ်မက်သစ်ပင်တိလည်း
ကိုယ့်အစာကိုယ်ချက်
ဆီးဖြစ်ဝါးဖြစ်တော့
အရက်တခတ်ချေနှက်ရစွာကိုကြိုက်တေ။

ဘုရားအလောင်းတော်လက်သစ်ရို့၏
ဩဝါဒကထာ နန့်လည်းမအပ်
လူကိုလူပိုင်မှတ်ဖို့တတ်ခလို့
ကဗျာရွီးရေ...
ငါ့ကဗျာကို နတ်သားတိလာမဖတ်လီကေ့။

                         ပန်းသီကြိုး(ရသေ့တောင်)
                         ၁၀-၉-၂၀၂၁

နီမြင့်လို့ရင့်လာရေအရူး

မသိ ခင် ကပင် မှားခစွာရာ

စေတနာမွမ်း လို့မသီခစွာပင်

ကံကောင်းလီယင့်။

သစ်တစ်ခက်ကို

အရိပ်မှတ်ခစွာလည်း

မပြည့်ဝခြင်းတစ်မျိုးယာ

မဖောက်ပြန်တတ်တေလောကမာ

ဖောက်ပြန်ရေအတွေးတိနန့်နီစရာမရ

အစရှာမရရေအဆုံး

လောကသဘာဝရာလို့

ထိုးချလိုက်ယင့်။

နားနန့်မျက်စိ နေရာလွဲလားလို့

ကြားရဖို့စွာကို မမြင်

မြင်ရဖို့စွာကိုမကြား

ကိုယ်တိုင်မှား‌ခရေ တရားတိနန့်

နောက်ပြန်လှည့်ကြည့်လိုက်တေခါ

လမ်းမှားနိန်ရေ ကဗျာတပုဒ်က

လက်ယက်ခေါ်လို့...။

ငါ့မာ...

နီမြင့်လီအရူးရင့်လီဆိုရေစကားထက်

ပိုပြောစရာမရှိ။

                    ပန်းသီကြိုး(ရသေ့တောင်)

                    ၁၀-၉-၂၀၂၁

ညဉ့်တာရှည်

သီတမ်းစာတစောင်ပိုင်

နောက်ဆုံးဆန္ဒကိုဆွဲထုတ်ပနာ

နိရက်တိကိုရွီ

ရက် ၊လ၊ နှစ် တိက

လမ်းသိတိုင်းလည်း

လားလို့မရ

မဆုံးနိုင်ရေအစတိနန့်

အိမ်မက်ကလန့်နိုးရေခါ

ညဉ့်ဆိုစွာ

မှောင်လို့ကောင်းတုန်းသိမ့်။

                 ပန်းသီကြိုး(ရသေ့တောင်)

                 ၉-၉-၂၀၂၁

https://www.dropbox.com/s/4terisk6pdlqq9g/Kyauktan%20Magazine%20No.2.pdf?dl=0