တောကြီးမျက်မည်းထဲမာ
အသားစားသတ္တဝါတိကအစွယ်ဝှက်ထားနိုင်ရေ
တိရစ္ဆာန်ဥပဒေစိုးမိုးရေ
နိုင်လိုမင်းထက်တိစိုးမိုးရေ
အဆိပ်မဲ့ပန်းဆိုကေ ကြွီ
ပုရွတ်ဆိတ်ချေတိပိုင်ယာ
မတော်တဆခြီမွခံလိုက်ရစွာမာ
အသက်ပါ ပါလားရေ
ဒေပြဇာတ်စွာ
နိဖြစ်ဖြစ် ညဉ့်ဖြစ်ဖြစ် အရေးမကြီး
ဘဝစွာဆိတ္ဆီကားထိုင်ကြည့်နိန်ရေပိုင်
မလုံခြုံရေစိတ်နန့် အသက်ရှူရရေ
အလောင်းကောင်တိထက်ကထိုးသွင်းဒဏ်ရာတိစွာ
လူတိနှလုံးသားကို အကြိမ်ကြိမ်ထိုးသတ်နိန်ရေ။
ဒေပြဇာတ်မာ
ဇာတ်လိုက်နန့်ဇာတ်လိုက်မ မပါ
ဇာတ်ပို့ ဇာတ်ရံ မပါ
မုဆိုးနန့်သားကောင်ရာပါရေ။
ဒေပြဇာတ်မာ
တရားခြင်းမတရားခြင်း မပါ
အကျိုးသင့်အကြောင်းသင့် မပါ
လောဘနန့်ဒေါသရာပါရေ။
ဒေပြဇာတ်မာ
ကိုယ်ချင်းစာတရား မပါ
မေတ္တာတရား မပါ
လူသားဆန်မှု မပါ
ဒေပြဇာတ်မာ
ဆိုင်းသံဗုံသံတိကတော့ တခြိမ့်ခြိမ့်
လက်ခုပ်သံ တဖြောင်းဖြောင်း
ကာလကာနောက်ကွယ်က ငိုသံသဲသဲစွာ
မသဲမကွဲ
မပီမသ
မထင်မရှား
မသိမသာ
မှုံ ဝါး တိုး တိမ် ပျောက် ကွယ်။
ပန်းသီကြိုး(ရသေ့တောင်)
၁၆-၈-၂၀၂၂
No comments:
Post a Comment