နွေရင်ခွင်ထဲက မိုးမျှော်ပိတောက် - ပန်းသီကြိုး(ရသေ့တောင်)

နွေဟာအပူချိန်တွေကိုမြိုချပြီး

ကိုယ်တိုင်ပဲ ခြောက်သွေ့ကွဲအက် စေခဲ့တယ်

အမှန်တရားဟာ သက်တောင့်သက်သာမရှိလှပါဘူး

ကိုယ့်သိက္ခာကိုယ်မြဲဖို့

ကိုယ့်အပူကိုယ်မြိုချရတာဟာ ဖြစ်ရိုးဖြစ်စဉ်ပါပဲ

နွေဟာ နွေလို ရဲရင့်ခဲ့ပါတယ်။

ရာသီကြမ်းပေမယ့် ပန်းတွေဟာပွင့်မြဲ

အပူလွှမ်းပေမယ့်

ပန်းတွေဟာလန်းဖို့ ရဲရင့်ကြပါတယ်

နွေမှာဖူး နွေမှာငုံ

မင်းဟာအပူငွေလည်းလှုံခဲ့တယ်

နွေမှာကြွေ နွေမှာဝေ

 မင်းဟာရွက်ဖူးအသစ်တွေလည်းနုခဲ့တယ်။

အပူကိုစားသုံးပြီး

မိုးစက်တွေကိုမှ မင်းကအမွှေးဆုံးပြုံးပြချင်တာလား

နွေရနံ့စွဲနေတဲ့ ပိတောက်ဖူးငုံရေ

ငါဟာ ပူလွန်းတဲ့နွေပါ

ခြောက်သွေ့ခြင်းသီအိုရီထဲမှာ

မင်းဟာ ညီမျှခြင်းအလွှဲနဲ့လှချင်ရှာတော့လည်း

ငါ့ကမ္ဘာကို မိုးတွေရွာဖို့ခွင့်ပြုခဲ့ပါတယ်

 ပိတောက်ခက်တွေအတွက်

ဒီမနက်မွှေးနေမယ့် မင်းရနံ့တွေအတွက်

ငါ့မျက်ရည်ဟာ မိုးရေစက်တွေဖြစ်ခဲ့ပါပြီ။

                            ပန်းသီကြိုး(ရသေ့တောင်)

                            ၃-၅-၂၀၂၂

‌