အိမ်ခြံမြေရောင်းမည်

                           ပန်းသီကြိုး(ရသေ့တောင်)

ကမ္ဘာကို အကွက်ရိုက်ရောင်းရေကောင်တိ

လေးဆယ်ခြောက်ဆယ်လား

လေးပေခြောက်ပေလား

ဆက်သွယ်ဖို့ဖုန်းကို

နံပါတ်မှားနှိပ်သူပိုင်

ဘဝဆိုစွာ တပ်ဆင်ထားခြင်းမဟိမ့်ရေ

နံပါတ်တခုပိုင်

တတီတီမြည်နိန်ရေ။

‌ခြံထိုးခံရရေမြီကို

ခြံထိုးမခံသိမ့်ရေမြီကသနားလို့

မျဉ်းတစ်ကြောင်း၏အကျယ်အဝန်းအကြောင်းတိကို

ကျယ်ကျယ်ပြန်ပြန်ရှင်းပြလို့

တန်ဖိုးအကြောင်း

ပေါက်ဈီးအကြောင်း

ဆက်သွယ်ရေးအကြောင်းတိပြောလို့

ဦးတည်ချက်ဆိုစွာလမ်းမကြီးဖြစ်ကြောင်းတိပါရေ။

လူနန့်တိရစ္ဆာန်ကြားကဆက်သွယ်ချက်ကို

စုံစမ်းဖော်ထုတ်ဖို့ အချက်အလက်တိလိုက်စု

ပုဂ္ဂလိက ခံစားမှုစွာ

အရောင်းအဝယ်မဖြစ်ဆုံးရောင်းကုန်

လူကြိုက်နည်းခြင်း၏အားသာချက်ထဲမာ

လွတ်ခြင်းလပ်ခြင်းတိက ကခုန်ပျော်ပါးလို့

ကမ္ဘာမြီစွာအများပိုင်လား

ကိုယ်ပိုင်လား

နိုင်ငံခြားရုပ်ရှင်တိထဲကပိုင်ဂြိုလ်သားတိ

ကမ္ဘာကိုစစ်ချီဖို့ရောက်နိန်ယာလား

သမိုင်းမာတင်ကျန်နိန်ရေ

နယ်မြီလုစစ်ပွဲတိအကြောင်းနန့်

ကိုယ်ခြံကိုယ်ထိုးလို့ စကားများရေရန်ပွဲတိကို

ထပ်တူချ ထားလိုက်စွာကောင်းရေ

"အိမ်ခြံမြေရောင်းမည်"

ဆက်သွယ်ရန်-ဂဏန်းဆယ့်တလုံး။

           11:21 am/18-1-2022