အရိပ်နန့်ဓာတ်မတည့်ရေရောဂါ

အရိပ်တိစွာ
သစ်စက်ထဲကလွှစာမှုန့်အဖြစ်ထွက်လာရေ

တရားဝင်ခြင်းမဝင်ခြင်းက
အရိပ်ရခြင်းမရခြင်းလောက်လက်တွီမကျ

အိုဇုန်းလွှာ
ခရမ်းလွန်ရောင်ခြည်
ကမ္ဘာကြီးပူနွီးလာမှု
Heat stroke  တိအကြောင်း
မိန့်မိန့်ပျောက်ပျောက်

အပင်ရိပ်မာတော့
လီခံသားတတိုင် ၏စကားဝိုင်းထဲ
ရာသီကြမ်းရေအကြောင်း
မိုးကိုအားကိုးမရရေအကြောင်း
ကိုယ့်လိုဘနန့်နန့်ကိုအပြည့်။

              ပန်းသီကြိုး(ရသေ့တောင်)
              ၃၀-၅-၂၀၂၁

လှိုင်းတိနန့်ပျံသန်းနိန်ရေမြစ်

နဂိုအလှတရားကဟိမ့်ပြီးသားရာ
ကောက်ကွေ့မို့မောက်နိန်ရေမျဉ်းတိ
အသူအနားသတ်ပြီးထားစွာလဲဝေ

မိုးသောက်ရောင်နီဦးကနိန်ပနာ
ညဇာဆည်းဆာထိ လှရေ
ညဉ့်အမှောင်မာတောင်
ရယ်သံလွင်လွင်ချေနန့် လှရေ

မြစ်မှန်ကေမရိုးနိုင်ရေစီးဆင်းခြင်းတိဟိမ့်ရေအတိုင်း
မင်းစီးဆင်းနိန်ရေ

မြစ်မှန်ကေ မအီးနိုင်ရေ လှိုင်းထန်ခြင်းအတိုင်း
မင်းလှိုင်းထန်နိန်ရေ

မြစ်မှန်ကေ တိုက်စားနိုင်ရေအတိုင်း
မင်းတိုက်စားရေ

မြစ်မှန်ကေ အနည်ချရေအတိုင်း
မင်းအနည်ချလိုက်ပါ

စီဆင်းခြင်းနိယာမမာ
မင်းပျံသန်းမိကေ
တဟုန်ပ
အတောင်ညောင်းပြန်အကျမာ
မင်းဘဝဇာပိုင်ပြန်လှဖို့သိမ့်လည်း။

             ပန်းသီကြိုး(ရသေ့တောင်)
             ၂၉-၅-၂၀၂၁