မာစတာကီးများအကြောင်း

မဝင်စီချင်လို့ပိတ်ထားရေအရာတိ
ဒေကီးတိမာဗြားစားလားရေ

စည်းမျဉ်းတိဇာလောက်များများ
လက်တလုံးခြားနိုင်ကေ ကျီယာ
ရလဒ်တိက
အထက်ထောင်ပစ်တေရဲသားပိုင်
တစ်ယောက်တော့သီနိန်ကျမလား။

လူပေါ်လူဇော်လုပ်နည်း
စာအုပ်ထုတ်ကတ်ကေ
တက်ကျမ်းဆရာတိလမ်းရဖို့မဟုတ်
ကျေးဇူးတော်ကိုအောင့်မိကေ
ဘဝနန့်ပစ ရက်ပြတ်ထပ်စိကျနီယင့်။

အပြောအဆိုပြေပြစ်တေ
အနီအထိုင်သိမ်မွေ့ရေ
လူကြီးလူကောင်းဆန်ရေ
အလုပ်ကိုကြိုးစားရေ
တာဝန်ကျီပွန်ရေ
အထက်ကိုအထက်
အောက်ကိုအောက်မှန်းသိရေ
ဇာလိုသိမ့်လည်း

အရွီ့တစ်ခုကိုရောက်ဖို့
မရှက်မကြောက် မတုန်မလှုပ်ရာဆက်လား
တံခါးတိကတော့ သူ့အလိုလို
ဂြွမ်း   ဂြွမ်း   နန့်ပွင့်လားလိမ့်မေ။

            ပန်းသီကြိုး(ရသေ့တောင်)
            ၁၂-၃-၂၀၂၁

ဆောင်းခိုပန်းတစ်ခက်

ဆောင်းခိုပန်းတစ်ခက်
ငွေသဇင် ဆိုရေ
ဆောင်းခိုပန်းတစ်ခက်က

ရခိုင့်ဂုဏ်သတင်းကို
သဇင်ခက်တိပိုင်တော်ဝင်နန်းထိုက်စီရေ

ရခိုင်ပြည်တောင်ပိုင်းနန့်မြောက်ပိုင်းကို
တံထားတစ်စင်းပိုင်ဆက်သွယ်ပီးခရေ

မြန်မာစာသည်ရခိုင်စာလို့
ထောက်ပြခရေ

ကမန်ဟူသည်လူလော့လေးလော့ဟု
အလင်းပြခရေ

သာသနာဝန်နန့်စာပီဝန်ကို
အမျိုးသားရေးအားမာန်နန့်
အမြဲတမ်းတက်ကြွနီခရေ

စာပီခရီးကြမ်းကို နှင်းသောက်လို့လှမ်းခရေပန်း
ရခိုင့်အနာဂတ်ကို
နိုင်သလောက်ထွန်းညှိပီးခရေအလင်းတန်း

ဆောင်းခိုပန်း
ဒေပန်းတစ်ခက်

အနွမ်းက
ရခိုင်သားတိုင်းကို
အမှတ်တရနန့်တမ်းတနိန်ရဖို့
၂၀၂၁မတ်လ(၇)ရက်
မိုးထ ၁၁:၁၀ မိနစ်မာ
ဒေနှစ်ဆောင်းကို နိဂုံးချုပ်လိုက်တေ။

                 ပန်းသီကြိုး(ရသေ့တောင်)
                 ၁၀-၃-၂၀၂၁
ဆရာတော်ဒွါရာဝတီအသျှင်ကုသလ
ငွေသဇင်(သံတွဲ)အားဒေကဗျာနန့်
တပည့်တော်ရိုသေစွာလက်စုံမိုးလို့
ရှိခိုးကန်တော့ပါရေ အရှင်ဘုရား။

နှင်းထူထူမိုးသောက်ဖက်သား

ဆောင်းလက်ကျန်နန့်လှနိန်ရေ
မိုးသောက်ဖက်သား
နှင်းထူထူမှုံဝါးဝါးတိက
မအီးချမ်းရေဆောင်းကို
ဟိမ့်သမျှအားနန့် ဆီးကြောသန့်စင်လို့။

မလုံခြုံရေစိတ်နန့်နိုးထလာဖို့
ကျိန်စာမပျယ်ရေ ရပ်ဝန်းကို
စေတန်တိက ဖန်ဆင်းထားရေ။

‌ပင်လယ်မဟုတ်ဘဲ
လှိုင်းထန်နိန်ရေ
လူနီရပ်ဝန်းတိများလာရေ။

လောဘ၊ဒေါသ၊မောဟကြောင့်
ဇာဘုရားပင်တရားချချ
ကျွတ်တမ်းမဝင်နိုင်ရေလူသားတိများလာရေ။

လူကိုလူချင်းသတ်မှ
မြတ်တေလို့ယုံကြည်သူတိများလာရေ။

ကမ္ဘာနန့်ဓာတ်မတည့်ရေရာသီစာတိ
များလာရေ။

ဒေပိုင်နန့်
နှင်းထူထူမိုးသောက်ဖက်တိမာ
မတရားသူတိကတရားခွေထဖွင့်ရေ။

             ပန်းသီကြိုး(ရသေ့တောင်)
             ၅-၃-၂၀၂၁

ရက်စွဲတခုထက်မပိုရေဘဝတိ

သတင်းတစ်ပုဒ်ဖတ်လိုက်ရတိုင်း

ဘဝကိုအနာတရတိနန့်သက်တမ်းတိုးနိန်ရရေခေတ်

မကုန်ဆုံးနိုင်အောင်တာရှည်ခံရေအနာတိကို

အံ့ကြိတ်လို့အိပ်နိန်ရရေ

ဘဝက

အရင်းပြန်မရရေစနစ်မာမှ

လူဖြစ်ခွင့်ရစွာလည်းဝဋ်တစ်မျိုးယာယေ

မသီသင့်ဘဲသီလားရေအသက်တိကို

နာမေအလှပချေနန့်အသက်ပြန်သွင်းလိုက်ရရေ

ရက်တစ်ရက်ကို

သေနတ်သံဇာလောက်နန့်တန်ဖိုးဖြတ်ထားလဲ

တစ်ဖက်ကအကျိုးအမြတ်စွာ

တစ်ဖက်ကအသက်တိနန့်လှရေ

စေတနာအလွဲနန့်အာဏာမြဲနိန်သရွိ

ကပ်ကမ္ဘာဆိုစွာ ဝဋ်ကမ္ဘာအဖြစ်

လောင်ကျွမ်းလိမ့်မေ

သွီးနန့်ရင်းရရေအရာတိုင်းကို

အမှတ်တရနန့်

စနစ်တကျနာကျည်းပါရစီ

အာဏာရူးတိတိုင်းပြည်မာ

ပြည်သူဆိုစွာ 

ဥပဒေနန့်အညီအသတ်ခံရရေ 

ရက်စွဲတစ်ခု။

                       ပန်းသီကြိုး(ရသေ့တောင်)

                        ၃-၂-၂၀၂၁