---------------------------
ဒီဇင်ဘာနက္ခတ်နန့်နှင်းကကြိုးထက်ကိုခုန်တက်လိုက်တိုင်း
ဒေ အမာရွတ်တိကို မုန်းရေ
လက်ဝါးပြင်ထက်မာကခုန်နီရေသွီးတိ
ပင်လယ်ပိုင်လှိုင်းကြီးလိုက်လီထန်လိုက်နန့်
ပျော်စရာဘုံနန့်အပါးဆုံးမာ
မလုံခြုံရေအသိထက်ဝက်နန့်
ဇာပိုင် လပြာလုံရဖို့စွာလဲ
လူ့သမိုင်းအတိမ်အနက်မာ
ကြည်သာရွှန်းလဲ့ခြင်းကင်းခရေရက်တချို့အတွက်
ဝမ်းနည်းမှုဆိုစွာ ရာသီပိုင်လည်နီရေ
ငြိမ်းချမ်းမှုကိုမငြိမ်းချမ်းမှုတိပါးက
တောင်းရရေ
အေးမြမှုကို ပူလောင်ခြင်းတိပါးက
တောင်းရရေ
ဆင်းရဲမှုကို ချမ်းသာမှုတိပါးက
တောင်းရရေ
ဒီဇင်ဘာလရောက်တိုင်းသဇင်တိပွင့်တုန်းသိမ့်ပါဝေ
နှင်းစက်တိထက်ကိုခုန်ဆင်းကူးခတ်လိုက်ပါ
ငါရို့ရပ်နီကေတောင်လည်နီရေကမ္ဘာကို
ယုံကြည်ပါ
အဆုံးတခုကိုရောက်တိုင်းအစပြုဖို့ပြင်ဆင်ပါ
နောက်တနှစ်ပြန်ဆုံကတ်တေခါ
အနာစွာအလွမ်းထက်မပိုကြောင်း
ပြောပြပါလိမေ။
ပန်းသီကြိုး(ရသေ့တောင်)
၃၁.၁၂.၂၀၁၉
